خط العمر بقلم الاستاذ محمد بدوى ابو العلا
خط العمر
************
مرسوم على ايدى خط العمر
سارح وطويل وأخره بعيد
بشاور وف طوله ماشى يجر
خطوط ورا منه فى كف الايد
وف أخره فروع رابطها المر
وقلب يدق فى قبضة إيد
ونبض أسير
لشريان واصل ف اخره وريد
وانا ماشى ف طريق العمر
ومش دارى ان ماشى شريد
وضاعت منى السنين بالصبر
وطريق الصبر ورقوا جريد
على نخله حاضنها طريق العمر
ماسكه الأرض بجذر عنيد
وبتحضن اوراقها نور الفجر
بتشقشق شمس عمر جديد
مزروع نخيلوا ف طريق الصبر
ثمارها بعيد مش طايله الايد
مرسوم على ايدى خط العمر
سارح وطويل وأخره بعيد
لكن عدى منى ومر
وشمع العمر اللى كان بيقيد
واتعلمت منه الصبر
شاخ ويدوب كان لسه وليد
وادام مرايتى بصدفه بمر
لقيت الشيب فى راسى شديد
وعدى بسرعه ومر العمر
واتخلخل من جوه الايد
م/محمد بدوى ابوالعلا
تعليقات
إرسال تعليق