بروحي بقلم الاستاذ عبد الرحمن الحناوي

 #من_ديوان_الحناوي

بشعر العامية المصرية .

( بنيت المجد طوبه طوبه )

بنيت المجد طوبه طوبه ولا فارق مع الأندال *

وشيلت الشك بصعوبه وانا صاحي ومش غفلان *

أدوق المر وأهي توبه أشيل الحمل والأحمال *

أروح الفجر دار زوبه أصحي الشاب والجدعان *

وأبدأ خطه مكتوبه تزلزل كل شخص احتال *

وأنقذ دنيا مخروبه وأزرع فيها كام بستان *

حاسيب الخلق معيوبه وادور بكره عالخيال *

واقوله الحسبه مظبوطه لا زياده ولا نقصان *

كتبت بإسمي منصوره يا بلدنا في كل مجال *

كتبت بدمي عالصوره وعالأهرام وعالجدران *

حكاية شعب في الكوره وفي الفن مالوهش مثال *

لاكن في العلم والشوره غابت بصمته أزمان *

أنا شفت الفكره مبتوره وبتأثر على الأجيال * 

وشفت الصوره مقهوره في قلب العقل والوجدان *

وشفت الدمعه محظوره بتتعاتب مع الكحال *

وشفت البسمه مذعوره بتتنفس هوا الدخان *

وشفت الصرخه مكتومه بتتندم على الأحوال * 

وشفت النفس مكسوره بتتخفى ورا الجدران *

شيلت الهم فوق راسي وقلت اصلح الأحوال *

لقيت الشعب بيآسي وبيدور على الإحسان * وبيجمع تمن قوته وبيدور على المرسال *

وبيلملم كده ف صوته وبيحاول يكون إنسان *

وبيداري ورا كسوفه مهازل عصر كان فسدان *

وشفت الضي في صباحه وشفت براءة الأطفال *

وشفت الشعب وكفاحه وشفت شهامة الشجعان *

وشفت البسمه مخنوقه وشفت الكذب في الأقوال *

وشفت العيلة معزومه على طبقبن بدنجان *

ولقمة عيشها مهضومه وطبق الكوسه شغال *

رحت أنادي على فارس يخلصنا من الحرمان *

ويبني مصحه ومدارس ويشجع على الإقبال *

لبى الفارس الحارس وقال يا مصر انا الآن *

رهن إشاره من إيدك أنا صاحي أنا يقظان *  

حاخلي الدنيا حواليكي واحه للرخا وأمان *

واسهل كل شئ فيكي واكتر لك أنا الأموال *

بروحي جاي أفديكي وتبقي مضرب الأمثال *

وكل الدنيا حواليكي تقول دي زهرة البستان *

وعمرك ما تمدي إيديكي للغازي أو المحتال *

وجنودنا دايما يحموكي في كل مكان وزمان *

---------------------------------------

بقلم د / عبد الرحمن فتحي الحناوي .

من

مصر .

الجمعة ٢٨ من أغسطس ( آب ) سنة ٢٠٢٠